قبل بس ما تحكم على اللي كتب المقال انه علماني ليبرالي، بيهاجم كل ما هو اسلامي.... اقرا المقال لحد الاخر، يمكن تقتنع بالفكرة.
هنا اقصد بالحكم الاسلامي هو الحكم من رأس الدولة، اي رئيس الجمهورية ولا اعني الحكومة او المجلس الشعب، طيب دلوقتي الاسلاميين بيقولوا دي فرضتنا اننا نمسك الحكم ونطبق الاسلام وشرع ربنا، وده كلام جدا ، لان البديهي ومن وجهه نظي ان التشريع الذي رضى به الله لعباده هو فوق اي تشريع وضعه قانون بشري.
حلو جدا... اتفقنا على اننا عايزين نحكم بشرع ربنا، لكن هل احنا مهيأيين للحكم ده؟ هتقولي طيب ما الرسول صلى الله عليه وسلم بعث بالرساله في وقت وظروف منيلة ب100 مرة عن اللي احنا فيها يكفي انه كان بيغير الاعتقاد الديني اصلا... طيب سؤال... هل تضمن ان يجي واحد بحكمه وسياسه الرسول حتى لو ب 1 %؟ لازم نفرق بين التشريع الاسلامي كمصدر من ناحية ، وفهم الناس وتطبيقهم له من ناحيه... اللي عمله الرسول انه طبقه بحذافيره، لكن احنا فهمنا وتطبيقنا يختلف من مكان لمكان... قارن كده بين فهم التشريع الاسلامي في السعودية، ماليزيا، حكومة حماس، السوان، اندونسيا، ايران ،تركيا... اكيد كل واحد ظروفه تختلف عن التناي وفهمه وتطبيقه يختلف عن التاني ... اصاب من اصاب واخطاء من اخطاء ... بس لازم نتفق ان التشريع في النهاية واحد.
نيجي بقى لحته الحكم الاسلامي اللي اقصد بيه رئيس الدوله... تعالى نشوف الخطر هيجي منين:
1-فوز مرشح اسلامي يعني استفزاز داخلي لطبقات من الشعب مش هتقبله بسهوله وخصوصا لو كان مرشح زي حازم صلاح ابو اسماعيل اللي قال اول ما هيمسك انه هيقفل الملاهي الليلية والشواطئ ويمنع الخمور... الشريحة دي تتمثل في المسيحيين والتيارات الليبرالية والعلمانية ورجال الاعمال والعاملين بالسياحة ومدن كاملة زي الغردقة وشرم الشيخ.
2- فوز مرشح اسلامي يعني استفزاز خارجي لعدم تقبل دول كثيرة حكم اسلامي على راسها امريكا... وده يعني وجود صدامات في المصالح السياسية والاقتصادية.
3- التلطيش هيقى على ودنه لأول رئيس، بمعنى ان كل المشاكل اللي موجودة في البلد الرئيس هو اللي هيشيلها.... قدامه يا يبقى اد المسؤلية يا مش هيبقى ادها، لو أدها يبقى خير وبركة، لو مش أدها يبقى اتحسب على كل التيار الاسلامي انه فشل في ادارة البلد.
4-نزوح الناخبين في الفترة اللي بعدها عن اختيار مرشح اسلامي لانه فشل في الاختبار الاول، وبالتالي كل سنه وانت طيب ان حد اسلامي يمسك الحكم تاني!
5- عدم الاستقرار اللي هيحصل للبلد من افتعال فتن طائفية وتدمير للسياحة والاقتصاد، لان في ناس مش هيعجبها الحال، فهتقولك انا ومن بعدي الطوفان... وشيل يا حلو.
طيب الحل ايه؟ الحل من رأي هو عزوف اي مرشح اسلامي عن الحكم، زي ما الاخوان عملت ، والمنافسة تكون على الانتخابات البرلمانية، لانه لو الاغلبية فيها للاخوان او التيار الاسلامي، فعندك دستور ذو مرجعية اسلامية، هيبقى عندك قوانين بتخرج ذات مرجعية اسلامية، هيبقي عندك اللي فبيحاسب بردو بيحاسب وتوجه اسلامي، يعني تشرع وتحاسب الموظف ولا تبقى انت الموظف؟ طبعا اكيد هتقول طب ما نبقى الاتنين، هقولك اقرا المقال من الاول!
بعد ال4 سنين ما تعدي والاوضاع استقرت الى حد ما والتيار الاسمى اثبت نفسه واثبت نجاحه واصبح مهيأ، للحكم، يبقى اهلا وسهلا، الكل مستعد للاستقبال، لان كله جرب، ال4 سنين دي كانت فترة تدريب، كل حاجة بالتدريج، اتمنى ان كل واحد يبدأ يفكر في الكلام ده مش يمكن يطلع صح؟
مصطفى ابوسيف
:)
